Hé! j’ai veu le temps
chanson 18
 

Hé! j’ai veu le temps que j’estoye à Bazac
Et  qu’avec moy chevauchoit le Soudenc.
Hé! et mis le siege tout droict devant Uzac
Où il y a trois milliers de hazenc
 En garnison et autant d’espelenc,
Ung chascun d’eulx bon arbalestre au poing.
De tirer fort ils prenoient fort grant soing.
Quant est à moy, j’en eu mainct horion
Dont jamais jour je ne serai vengé
Regardez donc si l’on doibt direou non:
''Le pain au fol est le premier mangé. "
 

Hé! il n’y a point d’ici en Armignac
Ni par delà la duché de Millenc
Hé!Ung si beau nedz que celuy Jehan Senac,
Il me semble d’ung duc ou chambrelenc,
Car il y a mille rubis de renc,
Bien arrunez, pendant Jusques au groing,
Tant qu’on le voit de cinquante lieux loing
Plus reluisant que ne faict ung poupon.
Pleust ore à Dieu qu’aujourd’huy fust logé
Dedans Brunval au cul de Monquandum!
" Le pain au fol est le premier mangé."
 

Hé! Je m’en alloys l’aultre jour à Lussac
Et rencontray au chemin de Hodenc
Hé, une fillette qui portoit ung bissac
Laquelle avoit sus moy l’oeil et la dent.
Atant s’arta, me tirant en ung coing;
Couart je fus, me retiray au loing,
Dont elle enfla plus gros qu’ung scorpion
Et de grant deuil m’eust voluntiers mengé.
Ce nonobstant m’en allai mon treon.
"Le pain au fol est le premier mangé."
 

  SOMMAIRE