A la duché de Normandie
chanson 3
A la duché de Normandie
Il y a si grand pillerie
Que l'on y peut avoir foyson.
Dieu doint qu'elle soit apaisie
Ou il faudra que l'on s'enfuye
Et laisser chacun sa maison
Quant a moy je n'y serai plus,
Car il n'y a point d'aisement
Pour la doubte des court vestus
Qui nous viennent voir trop souvent
A la duché ....
Ils viennent par grand ruderie
Demander ce que n'avons mye,
Et nous donnent mainct horion.
Encor faut il que l'on leur die:
"Mes bons seigneurs, je vous en prie,
Prenez tout ce que nous avon"
A la duché ....
Je leur donnasse volluntiers
Se je le pensoye avoir de quoy;
Maiz, sur ma foy, tous mes deniers
Et tout mon bien est hors de moy.
Je ne puys faire courtoysie,
Car povreté me contrarie
Et me tient en subjection,
Je n'ay plus amy ne amye
En France ne en Normandye,
Qui me donnast ung porion.
A la duché ....
Dieu vueille mectre bonne paix
Par toute la crestienté,
Mais que ce soit à tout jamaiz,
Si vivrons tous en loyauté.
Se crestienté fust unye
Nous menassions joyeuse vye,
Et mectrion tristesse enprison.
Ceulx par qui c'est, Dieu lez mauldie,
Et aussi la Vierge Marie
Sans avoir jamais guérison.
A la duché ....