Souvent je m'esbats et mon cueur est marry,
Je vis en deul et en grant desplaisance,
Toutes les fois que j'en ay souvenance,
C'est de la belle qui vers moy a failly.
El m'avoit baillé et promise sa foy,
Qu'el m'aimeroit par dessus tous loyaulment:
Mais avec elle un aultre je trouvay,
Lequel son plaisir prenaoit secretement
Oncques a nul jour plus tristesse ne vy.
De moy amer el me monstroit semblance,
Et si disoit qu'el avoit desirance
D'estre m'amye, mais elle m'a failly.
Souvent je m'esbats et mon cueur est marry,
Je vis en deul et en grant desplaisance,
Toutes les fois que j'en ay souvenance,
C'est de la belle qui vers moy a failly.
Pas n'eusse cuidé voir, n'en doubtez mye,
Que pour nul rien n'eust voulu decepvoir:
Celuy est prins de bien grande follie
Qui cuide femme a luy tout seul avoir.
De leurs faulces amours et d'elles je dis: Fy!
Car tout leur faict ce n'est que decevance.
Il est bien fol qui à fame a fiance,
Car à bien peu ils sont touttes ainsi.
Souvent je m'esbats et mon cueur est marry,
Je vis en deul et en grant desplaisance,
Toutes les fois que j'en ay souvenance,
C'est de la belle qui vers moy a failly.