Dieu mercy, j’ay bien labouré,
Aussi ma charrue est lassée;
Jamais je ne l’atelleray,
Tant qu’el soit ung peu reposée,
Tantqu’el soit ung peu reposée.
IJ'avois deulx beufz et I poulain
Qui soulloyent bien tirer d'accord.
Mais le rouge a le cueur si vain,
Qu'a bien petit qu’il n’en mort.
Hellas! il est bien enhané
De la grant douleur que j’avoye,
Dont j’ay laissé, bien estonné,
La charruette enmy la voye.
Dieu mercy, j’ay bien labouré,
Aussi ma charrue est lassée;
Jamais je ne l’atelleray,
Tant qu’el soit ung peu reposée,
Tantqu’el soit ung peu reposée.
Je lesray ma terre gesir
Qui se voulsist bien labourer,
D’en voir le fruict j’ai grand desir;
Dieu m’y doint bien perseverer.
Mais il y a ung feugueray
Qui est l’orée d’une valée,
Où j’ay par maincte foys bouté
Ma charrue jusqu’à la roye.
Dieu mercy, j’ay bien labouré,
Aussi ma charrue est lassée;
Jamais je ne l’atelleray,
Tant qu’el soit ung peu reposée,
Tantqu’el soit ung peu reposée.
Il fault mon poullain reposer
Et froter et tenir chault,
Car il ne se veult disposer
A labourer, le cueur luy fault.
En tout temps, esté et yver,
Volluntiers je laboureroye,
D’acord, de hait, sans estriver:
J’y prends soullas, plaisir et joye
Dieu mercy, j’ay bien labouré,
Aussi ma charrue est lassée;
Jamais je ne l’atelleray,
Tant qu’el soit ung peu reposée,
Tantqu’el soit ung peu reposée.