Hui matin a l’ajournee
Toute m’ambleiire
Chevauchai par une pree
Par bonne aventure.
Une flourete ai trouvee
Gente de faiture
En la fleur qui tant m’agree
Tournai lors ma cure.
Adonc fis vers jusqu’a sis
De la fleur de paradis
Chascun lo qui l’aint et lot.

N’i a tel dorenlot,
Por voir, tout a un mot.

Sache qui m’ot Marvi, mar ot
Qui lais Marie pour Marot

Qui que chant de Mariëte,
Je chant de Marie.
Chascun an li doit par dete
Une reverdie.
C’est la fleurs, la violete
La rose espanie,
Qui tele oudeur donne et giete,
Tous nous rasazie.
Haute oudeur seur toute fleur
A la mère du haut seigneur.
Chascun lo qui l’aint et lot.

Sache qui m’ot Marvi, mar ot
Qui lais Marie pour Marot

Chant Robins de Robardeles,
Chant li sot des sotes,
Mais tu, chers, qui chantes d’elles,
Certes tu rasotes.
Laissons ces viès pastoureles,
Ces vielles riotes,
Si chantons chançon nouvelles,
Biaus dis, beles notes,
De la fleur dont sanz sejour
Chantent anges nuit et jour.
Chascun lo qui l’aint et lot.

Sache qui m’ot Marvi, mar ot
Qui lais Marie pour Marot