Royne celestre,
Bien fusses tu nee
Quant porte et fenestre
Du ciel es nommee
Tant est de haut estre
Pucele sacree
Qu’el ciel a sa destre
T’a Dieu couronnee

Car de ta mamele
Qui tant est mielee
Fu sa bouche bele
Peue et abrevree.
Haute damoisele
Virge beneiiree
Touzli mons t’apele
Partout es reclamee.
Haute pucele pure et monde,
De toi sourt la rousee
Dont as toute la riens du monde
Norrie et arousee.
Royne ennoure
Bien fusse engendree
Car plus es douce et plus plesanz
Et plus sade cent mile tanz
Que mieuz en fresche ree
Riens qua saveur
Sans ta saveur
Ne m’est a savouree
Certes qui ne bee
De toute sa pensee
A toi servir tout en apert
Puis bien dire que s’ame pert
Et qu’ele en iet dampnee
Mais qui te sert Dieu en desert

Royne celestre...