Talenz m’est pris orendroit
Qu’a mout haut ton
De la plus haute qui soit
Vous die un nouviau son
Sa hautesce ne saroit
Dire nul hom
Por ce ne vueil si haut droit
Chanter se de li non.
Dieu me doint sa haute amor
N’est dame de sa valour
N’onques ne fu a nul jour
Nule de si haut non.

Eve a mort toz nous livra
Par son forfait.
Marie nos delivra
Par li sons tot refait.
Qui de douz cuer l’amera
Et de parfet
Ja jor dampnez ne sera
Por riens qu’il ait meffait.
Car de tous ceus tret l’amer
Qui la veulent reclamer
Dieu, Dieu, Dieu! com douz aimer
Si douce dame fet.