Efforcier m’estuet ma voiz
Quant de celui me souvient
Qui la sorse est et la doiz
Dont tout le bien sourt et vient.
Trop est cuverz, trop est froiz
Qui ne l’aime, doute et crient.

Hé, mere au roy du ciel,
Plus es douce de miel.
Oste de moi le fiel,
Bele douce dame.

Mere Dieu, aiés de moi merci,
Merci, merci, merci, merci
De ma chaitive d’ame.

Mere Dieu, tu es la fleur
Ou li sires descendi
Qui en croiz pour les pecheurs
Ses sains membres estendi.
Paradis ta grant douceur,
Douce dame, nous rendi.
Sauz est par toi li monz
Porte du ciel et ponz,
Doiz de douceur et fonz,
Mere Dieu, aiés de moi...
Mere Dieu, tu es la tour
Qui deffens des ennemis
Du diable et de ses tours
Tes servans et tes amis.
Tant nous rent de grant estorz
Li decevanz ennemis
Tost nous aurait tentez
Veincuz et surmontez
Se n’iert tes granz bontez,
Bele douce dame.

Mere Dieu, aiés de moi merci,
Merci, merci, merci, merci
De ma chaitive d’ame.