Dous amis, oy mon complaint:
A toy se plaint
Et complaint,
Par defaut de tes secours,
Mes cuers qu'amours si contraint
Que tiens remaint;
Dont mal maint
Ay, quant tu ne me secours
En mes langours,
Car d'aillours
N'est riens qui confor m'amaint.
S'en croist mes plours
Tous les jours,
Quant tes cuers en moy ne maint.
Amis, t'amour si m'ataint
Que mon vis taint
Et destaint
Souvent de pluseurs coulours
Et mon dolent cuer estraint;
Si le destraint
Qu'il estaint,
Quant en toy n'a son recours.
S'a jours trop cours,
Se n'acours
Pour li garir, car il creint
Mort qui d'amours
Vient le cours,
Quant tes cuers en moy ne maint.
Mon cuer t'amour si ensaint
Qu'il ne se faint
Qu'il ne t'aint
Pour tes parfaites douçours;
Et ta biauté qui tout vaint
Dedens li paint
Et empraint
Aveuc tes hautes valours.
S'en sont gringnours
Mes dolours
Et plus dolereus mi plaint
Et en decours
Mes vigours,
Quant te cuers en moy ne maint.
De bonté, de valour,
De biauté, de douçour
Ma dame est parée;
De maniere, d'atour,
De scens, de grace est couronnée.
Dame desirée,
Richement aournée
De coulour,
Bien endoctrinée,
De tous à droit loée,
Par savour,
Juenette, sans folour,
Simplette, sans baudour,
De bonne heure née,
Parfaite en toute honnour,
Nulle n'est à vous comparée.
De bonté, de valour,
De biauté, de douçour
Ma dame est parée;
De maniere, d'atour,
De scens, de grace est couronnée.
Car loyal, secrée,
De bonne renommée,
Sans faus tour,
Franche et esmerée,
Nette, pure, affinée,
La millour
De toutes de la flour,
Sans mal, sans deshonnour,
Estes apellée.
Pour ce avés sans retour,
Mon cuer, m'amour et ma pensée.
De bonté, de valour,
De biauté, de douçour
Ma dame est parée;
De maniere, d'atour,
De scens, de grace est couronnée.
Et s'il vous agrée,
Gentil dame honnourée,
Que j'aour,
Qu'en moy soit doublée,
Sans estre ja finée,
Ma langour,
Si vueil je la dolour
Et l'amoureuse ardour,
Qu'en moy est entrée,
Endurer nuit et jour,
Ne ja n'en serés meins amée.
De bonté, de valour,
De biauté, de douçour
Ma dame est parée;
De maniere, d'atour,
De scens, de grace est couronnée.