QUANT J’AY ESPART DE VO REGART
Quant j ‘ay espart de vo regart
dame d’ onnour
car main et tart m’esprent son dart
de fine amour
Et me repart d’un ris qui m’art
Mais celle ardour
son dous art
de moy despart
toute doucour
par son dou art
de moy part
toute doulour
Cinc un treize uit neuf d’amour fine
qu’espoir vuet que d’amer ne fine
si que plus que fins ors s’affine
m’ont espris sans definement
mes cuers pour amer finement
Ce qui soustient moy m’ onneur et ma vie
long pres toudis serez quoi que nuls die
Et quand je vif par vous douce anemie
aveuc amours c’estes vous douce dame
Qu’ains mieux que moy bien dire doy par m’ ame
Dous viaire gracieus
vueillies moy estre piteus
se je sui un po honteus
de fin cuer vous ay servi
ne me mettes en oubli
Se vous n’estes pour mon guerre donnee
jamais ne mieux joie guerre donnee
car par vous m’iert la grief guerre donnee
Dame mar vi vo dous regart riant
qui me fera morir en guerriant
Ma fin est mon commencement
et teneure vraiement
mes tiers chans trois fois seulement
et mon commencement ma fin
se retrogarde et ainsi fin
Tant doucement me sens emprisonnes
jamais ne quiert estre desprisonnes
car tous biens m’est en ceste prison nez
qu’onques amans n’ost si douce prison
que dame puet donner sans mesprison
Rose liz printemps verdure
fleur baume et tres douce odour
et tous les biens de la nature
avez dont je vous aour
Et quant toute creature
seurmonte vostre vahour
bien puis dire et par honnour
bele passes en doucour
Puis qu’en oubli sui de vous dous amis
Mar vi le jour que m’amour en vous mis
Mais ce tenray que je vous ay promis
vie amoureuse et joie a dieu commant
C’est que jamais n’aroy nul autre amant
Quant ma dame les maux d’amer m’ aprent
Qu’en grant doucour mon cuer tient et esprent
dont qui les biens a droit saveure et prent
Elle me puet aussi les bien aprendre
riens n’est plus dous c’est legier a comprendre