Quant voi en la fin d’esté
La fueille cheoir
Et la grant jolieté
D’oisiaus remanoir,
Lors ai de chanter vouloir
 Greigneur que je ne soloie,
 Car cele a qui je m’otroie
Ligement
M’en a fet conmandement,
 Si chanterai.
Et quant ma dame plera, joie avrai.

Cuer qui n’aime ou n’a amé
 Ne puet riens valoir;
Pour ce, j’ai le mien doné
Sanz jamés mouvoir,
Et si sai bien tout de voir
Que par haut penser foloie.
Conment qu’avenir m’en doie,
 Loi au ment
A Amors servir me rent,
Tant com vivrai.
Et quant ma dame plera, joie avrai.

Tant me plest sa grant biauté
 A ramentevoir,
Que j’ai tout autre pensé
Mis en nonchaloir,
 Las! et si ne puis savoir
 Se mon penser bien enploie,
Car pour rien ne li diroie
Que je sent,
Fors qu’en chant si fetement
 Li gehirai.
Et quant ma dame plera, joie avrai.

Darne, en droite loiauté
Et sanz decevoir,
En vo debonereté
Met tout mon pouoir.
 Car me daigniez recevoir,
Dame en qui touz biens ondoie!
 Vo grant biauté me guerroie
Si griément,
Se je n’ai alegement,
Pour vous morrai.
Et quant ma dame plera, joie avrai.

Mesdisanz, vo mauvesté
M’a mult fet doloir,
Et s’ai mainte foiz douté
Vostre apercevoir.
Mau feu les puist touz ardoir
Si voir com je le voudroie!
 Hé, bone Amor qui g’en proie,
Vengiez m’en!
Donez chascun un torment
Tel com je ai.
Et quant ma dame plera, joie avrai.