Au renouvel du tens que la florete
Nest par ces prez et indete et blanchete,
Trouvai soz une coudrete coillant violete
Dame qui resenbloit feë et sa conpaignete,
A qui el se dementoit
De deus amis qu'el avoit
Au quel ele ert amie:
Ou au povre qu'est cortois,
Preuz et larges plus que rois
Et biaus sanz vilanie,
ou au riche qu'a assez avoir et manandie,
Mes en li n'a de biauté ne sens ne cortoisie.

"Ma douce suer, mon conseil en creez:
Amez le riche, grant preeu i avrez;
Car se vous volez deniers, vous en avrez assez;
Ja, de chose que il ait, mes sousfrete n'avrez.
Il fet bon le riche amer,
Q'il a assez a doner;
Je seroie s'amie.
Se je lessoie mantel
D'escarlate por burel,
Je feroie folie;
Car li riches veut amer et mener bonne vie,
Et li povres veut jöer sanz riens donner s'amie.

-Or ai oï ton conseil, bele suer,
Du riche amer; ne le feroie a nul fuer!
Certes, ja n'iert mon ami par deseure mon cuer.
Dames qui vuelent amer
De bone amor sanz fausser,
Conment que nus me die,
Ne doivent riens demander,
Pour nus qu'en sache parler,
Fors bone amor jolie.
Toutes fames je les hé, et Jhesus les maudie,
Qu'aiment honme pour doner; c'est grant ribauderie.

E! fine amor, tant m'avez oublïee
Que nuit ne jor ne puis avoir duree,
Tant m'a sa tres grant biauté tainte et descoloree
Tant pens a li nuit et jor que toute en sui müee.
Rosignol, va, si li di
Les maus que je sent pour li,
Et si je n'en me plaing mie;
Di li q'il avra m'amor,
Car plus bele ne meillor
De moi n'avra il mie;
Di li q'il avra assez puis que je sui s'amie,
Q'il ne lest pas pour deniers a mener boune vie."