Quant voi la flor nouvele
Partoir en la praele
Et j'oi la fontenele
Bruire seur la gravele,
Lors mi tient amors nouvele,
Dont ja ne garai.
Se cist maus ne m'asouage
Bien sai que morrai.

"Je suis sade et brunete
Et joenne pucelete,
S'ai color vermeillete,
Euz vers, bele bouchete;
Si mi point la mamelete
Que n'i puis durer.
Resons est que m'entremete
Des douz maus d'amer.

Certes, si je trouvoie
Qui m'en meïst en voie,
Volontiers aimeroie;
Ja por nul ne leroie
Car bien ai oï retrere
Et por voir conter
Que nus n'a parfete joie
S'el ne vient d'amer."

Vers la touse m'avance
Por oïr s'acointance;
Je la vi bele et blanche,
De simple contenance.
Ce que je li dis.
Maintenant sanz demorance
S'amor li requis.

Pris la par la main nue,
Mis la sus l'arbe drue;
Ele s'escrie et jure
Que de mon geu n'a cure:
"Ostes votre lecheüre!
Deus la puist honir!
Car tant m'est asprete et dure
Ne la puis souffrir."

"Bele, tres douce amie,
Ne vos esmaiez mie;
Oncor ne savez mie
Con ce est bone vie.
Vo mere n'en morut mie,
Ce savez vos bien.
Non fera, certes, la fille
N'en doutez de rien."

Quant l'oi despucelee,
Si s'est en piez levee;
En haut s'est escrïee:
"Bien vos sui eschapee.
Treze anz a que fui nee,
Par mien escïent;
Onques mes n'oi matinee
Que j'amasse tant.