L'autrier m'iert levaz,
Sor mon cheval montaz,
Sui por deduire allaz,
Laz une praierie.
Ne fui gaire esloignaz
Can me sui arrestaz,
Si descendi el praz
Soz une ente florie;
S'ai ermenjon choisie:
Onkes rose espanie
Ne fu tals ne cristaus.
Vers li vois liez et baus,
Car sa beltaz m'en prie.

Quant la fui aprochaz,
Dis li "suer, car m'amaz,
Honorade en seraz
En tote vostre vie."
"Signer, ne moi gavaz;
Bien sai prou troberaz
Fenne cui ameraz,
Plus riche et meuz vestie."
"Bele, je ne quier mie
En amor seignorie;
Sens mi plaist et beltaz,
Dont grant plantaz avaz
Et dolce compaignie."

"De folie parlaz,
Car ren n'en porteraz,
C'autres est affiaz
D'avoir ma druderie,
Se tost ne remontaz
Et de ci non tornaz,
Ja  seraz malmenaz,
Que Perrins nos espie,
Et saura grant aïe
De bergiers s'il s'escrie".
"Bele, ja n'en dotaz,
Mais a mei entendaz:
Vos dites grant folie."

"Sire, al moins je vos prie,
K'aiez de moi merci;
Ke je remandrai ci,
Si serai mal baillie."
"Bele, je vos affie,
Se m'avez a ami,
N'i aura si hardi
Qui oltra je vos die.
Por Deu, soiez m'amie."
"Sire, n'en parlaz mie,
Por tout ceu ke je vi
A Limoges mardi
Nel vos creanterie."

"Bergiere, or est ensi:
Fols sui quant plus vos cri,
C'onkes nulz ne joi
De longue roterie."
Lors la trais pres de mi;
Ele geta un cri,
K'onkes nuls ne l'oï.
Ne fu par trop estrie,
Ains m'a dit cortesie:
"Sire, g'iere marrie
Quant vous venistes ci.
Or ai lo cuer joli,
Vostre geus m'a garie."