J'ai fet maint vers de chançon
Et si mainte foiz chanté;
Onques n'en oi guerredon,
Nis tant c'on m'en seüst gré,
Mes ja por ce n'iere faus.
Toz fins et loiais
M'en irai,
Et serai
Sages, si me retrerai
D'amer celi
Ou il n'a point de merci

Je ne donroie un bouton
D'amors ne de sa fierté;
Issuz sui de sa prison,
Ou j'ai maint mal enduré.
Amors n'est fors paine et maux,
Tormenz et travauz;
Joie n'ai
Quant les ai;
Et por ce me retrerai
D'amer celi
Ou il n'a point de merci

Se j'amasse traïsson
Ne me dit me fauseté,
L'on meüst tenu a bon
Et si m'eüst on amé.
Certes, amors desloiaus,
Je n'iere  de çaus,
Ainz ferai,
Quant voudrai
Chançon si me retrerai
D'amer celi
Ou il n'a point de merci

Nus ne se puet avancier
En amer fors par mentir;
Et qui meuz s'en set aidier,
Plus tost en a son plesir.
Qui fame justisera
Ja ne l'amera
Par couvent
Loiaument;
Et por ce je me repent
D'amer celi
Ou il n'a point de merci

Certes, ja celer ne le quier:
G'enpris ma dame a servir;
Rendu m'en a  tel loier
Qu'ele me cuida traïr.
Voirs fu, s'amor m'otroia,
Mes el me gaba
Por vil gent.
Vengement
M'n doint Deus! Je me repent
D'amer celi
Ou il n'a point de merci