Hé, amors, je fui norris
En vostre covent
Et cuidai manoir tos diz
En vos ligement
Sanz ja dessevrer;
Mais je n'i porrai durer,
Ce m'est avis,
Car de totes parts sui assaillis
Se n'i ai mort deservie;
Mes biens vueill qu'amors m'ocie.

Ainc mais nus si entrepris
Ne fus por noient,
N'onques si loiaux amis
N'ot tant de torment
Cont j'ai por amer,
Car ceus ou me doi fier
Truis anemis.
Deus m'en doint venjance a mon devis.
Car n'i ai mort deservie;
Mes biens vueill qu'amors m'ocie.

Mout es mes cuers esbahiz
Qui tant de maus sent,
Si ne sai pas deservis
Ne ne sai conment
M'en puisse eschiver.
Hé las! por li foi porter
Sui je trahis,
Si que des malvés en sui haïs,
Si n'i ai mort deservie;
Mes biens vueill qu'amors m'ocie.

Et puis que sui acueilliz
De si mal gent
Bele, e, qui j'ai mon cuer mis,
Car aiez talent
De moi conforter,
U je ne puis eschaper
De lor mains vis;
Et se vos volez, je suis garis,
Car n'i ai mort deservie;
Mes biens vueill qu'amors m'ocie.

Tout le pooir mout pou pris
Et le nuisement
De ceux dont je sui faidis,
S'en vo biau cors gent
Puis merci trover.
Aidiez m'as resvigorer,
Car vos porfis
Iert, s'eschaper puyis sanz estre ocis,
Car n'i ai mort deservie;
Mes biens vueill qu'amors m'ocie.

Damoisele de grant pris,
Tasse, proiez l'ent
Qu'a ceus par cui sui nuisis
Prende vengement.
Par moi rapeler,
Les cuers lor feroit crever,
De ce sui fis;
Et je n'ai pas ces maus deservis;
E quant n'ai mort deservie,
N'est pas drois qu'amors m'ocie.