Hui main par un ajournant
Chevauchai les un buisson;
Les l’oriere d’un pendant
Guardoit bestes Robeçon.
Quant le vi, mis l’a raison:
«Bregier, se Dieus bien te dont,
Eüs ainc en ton vivant
Pour amour ton cuer dolant?
Quar je n’en ai se mal non.

-Chevalier, en mon vivant
Ainc n’amai fors Marion,
 La courtoise, la plaisant
 Qui m’a doné riche don,
Panetiere de cordon,
Et prist mon fermaill de plom.
Or s’en vait apercevant
Sa mere qui li deffant,
Si l’en a mise a raison. »

A pou ne se vait pasmant
Li bregiers pour Marion.
Quant le vi, pitiez m’en prent,
Si hi dis en ma raison
«Ne t’esmaie, bregeron;
ja si ne l’enserreront
Qu’ele lait pour nul tourment
Qu’ele ne t’aint Ioiaument,
Se fine Amours l’en semont.

— Sire, je sui trop dolens
Quant je voi mes compaignons
Qui vont joie demenant;
Chascuns chante sa chançon
Etje sui seus environ;
Affuble mon chaperon,
Si remir la joie grant
Qu’il vont entour moi faisant.
Confors n’i vaut un bouton.

— Bregier, qui la joie atent
D’amours fait grant mesprison,
Se les maus en gré n’en prent
Touz sanz ire et sanz tençon:
En mout petit de saison
Rent amours grant guerredon,
S’en sunt hi mal plus plaisant
Que on a soufert devant
Dont on atent guarison.

— Chevalier, pour rienz vivant
N’os parler a Marion
Et si n’ai par cui hi mant
Queje muir en sa prison
Pour les mesdisans felons
 Qui ne dïent se mal non,
Ainz vont trestout racontant
Quej’aim la niece Coustant,
La fihlastre dant Buevon.»