Les un pin verdoiant
Trovait l'autrier chantant
Pastore et som pastor.
Cele va lui baisant
Et cil li acolant
Par joie et par amor.
Tornai m'en un destor:
De veoir lor doçor
Oi faim et grant talant.
Mout grant piece de jor
Fui iluec a sejor
Por veoir lor samblant.
Cele disoit:"o! a! é! o!"
Et Robins disoit: "Dorenlot!"

Grant piece fui ensi,
Car forment m'abeli
Lor gieus a esguarder,
Tant que je departi
Vi de li son ami
Et ens el bois entrer.
Lors eu talent d'aler
A li por saluer;
Si m'assis delez li,
Pris a li a parler,
S'amor a demander,
Maiz mot ne respondi.
Ançois disoit:"o! a! é! o!"
Et Robins el bois: "Dorenlot!"

"Touse, je vous requier,
Donez moi un baisier;
Se ce non, je morrai.
Bien me poez laissier
Morir sanz recovrier
Se je le baisier n'ai.
Sor sains vos jurerai:
Ja mal ne vos querrai
Ne forceur destorbier."
"Vassal, et je le ferai,
Trois fois vos baiserai
Por vos rassoagier."
Ele redit:"o! a! é! o!"
Et Robins disoit: "Dorenlot!"

A cest mot, plus ne dis;
Entre mes bras la pris,
Baisai l'estroitement;
Maiz an conter mespris,
Por les trois en pris sis.
Ele dit en riant:
"Vassal, a vos creant
Ai je fait largement
Pluz que ne vos pramis;
Or vos proi bonement
Que me tenez covent,
Si ne me querez pis."
Cele redit:"o! a! é! o!"
Et Robins el bois: "Dorenlot!"

Li baisier par amor
Me doublerent l'ardor
Et pluz en fui destrois.
Par desous moi la tour,
Et la touse ot paor
Si s'escria trois fois.
Robins oï la vois,
Gautelos et Guifrois
et cistre autre pastor;
Corant issent du bois
Et je,gabez, m'en vois,
Car la force en fu lor.
Puis n'i ot dit:"o! n'a! é! o!"
 Robins ne dit puis: "Dorenlot!"