Nus chanters mais le mien cuer ne leeche
Des ke chil est del siecle departis
Ki des honors  iert la voie et l'adreche,
Larges, cortois, saiges, nes de mesdis.
Grans dolors est ke si tost est fenis;
A oes tos ceaus a cui estoit amis,
D'aus honorer et aidier n'ot perece.

Gherart, amis, la toie mors me blece,
Quant me sosvient des biens ke me fesis.
Dieus, ki en crois soffri mort et destreche
Pour son pule jeter des andecris,
Le vos rengë ensi com jou devis;
K'il vous otroit le sien saint paradis:
Bien aves deservi c'om vos i mece.

Mors, villaine iés, en toi n'a gentillece,
Car tu as trop villainement mespris;
Bien deüssiez esparnier le jonece,
Et le cortois, le large, au siecle mis.
Mais tel usaige as de piech'a apris
Ke nus n'en iert tenses ne garandis,
Ne haus ne bas, jonece ne viellece.

N'i puet valoir ne avoirs ne richesse
Contre la mort; de çou soit chascuns fis.
Pour çou se fait boin garder c'on n'endece
L'armë en tant ke on n'i soit sospris.
Ki en honor et em bien faire iert pris
Et avra Dieu par ses biens  fais conquis,
Il avera faite boine proëche.

Mors, tolu m'as et men blé et me veche
Et mes cortieus; tos les mes a ravis.
Bien est raisons ke ma joie demece
Puis ke tu m'as tolu et jeu et ris.
Bien mi deüst reconforter Henris,
Robers Crespins, ou j'ai mon espoir mis:
En ceaus ne sai nule mauvaise teche.

Des serventois va t'en tos aatis;
Signeur Pieron Wyon et Wagon dis
Ke petit truis ki me doinst ne promece.