Trop est mes maris jalos,
Sorcuidiez, fel et estouz,
Mes il sera par tens
cous
Se je truis mon ami douz,
Li gentil, li savoros.
Mari ne pris rien,
Q'il n'aime nul bien.
Je le vos di:
Dire fi
Doit on du vilain plain d'ennui.
Quant a la fenestre vois,
Il me gueste trestoz
jorz;
Sachiez q'il vit seur
mon pois,
Car por lui pert mes
amors.
Il sert bien que j'aime
aillors;
Or se puet desver,
Car je vueil amer.
Je le vos di:
Dire fi
Doit on du vilain plain d'ennui.
Cuidë il por son
avoir
Metre en prison cuer
joli?
Nenil voir! il n'a pouoir
Que soie du tot a lui;
A m'amor a il failli.
Nus ne doit avoir
Ami por avoir
Ce vos di:
Dire fi
Doit on du vilain plain d'ennui.
Hardiement li dirai:
Fol vilain maleüros,
Amer m'estuet sanz delai,
Sachiez, un autre que
vos;
or pöez estre jalos;
Je vos guerpirai,
Un autre amerai
Je le vos di:
Dire fi
Doit on du vilain plain d'ennui.
Por tot l'avoir de Cisteaus
Ne doit avoir cuer joli,
Ce dit Estienne de Miauz,
Jolive dame mari,
Ançois doit avoir
ami.
Et je l'en crerrai
Et ami avrai.
Je le vos di:
Dire fi
Doit on du vilain plain d'ennui.