Deus est ensi conme li pellicans,
Qui fait son ni et plus haut arbre sus;
Et li mauvais oisiaus, qui vient de jus,
Ses oisellons ocit, tant est puanz
Lï peres vient destrois et angoisseus.
 Dou bec s’ocit; de son sanc dolereus
Vivre refait tantost ses oisellons.
Deus fist autel quant fu sa passions;
De son douz sanc racheta ses enfans
Dou deable, qui muit estoit puissanz.

Li guerredons en est mauvais et lens,
Que biens ne drois ne pitiés n’a mes nus;
Ainz est orgueils et baraz au dessus,
Felonie, traïsons et beubans.
Mult par est or nostre estat perillous,
Et se ne fust li essamples de ceus
Qui tant aiment et noises et tençons
Ce est des clers qui ont laissié sarmons
Por guerroier et por tüer les gens
Jamés en Dieu ne fust nus hons creans.

Nostre chief fait touz noz menbres doloir,
Por c’ est bien drois qu’a Dieu nos en plaignons,
Et grant corpe ra mult seur les barons,
Qui il poise quant aucuns veut valoir;
Et entre gent en font mult a blamer
Qui tant sevent et mentir et guiller.
Le mal en font deseur els revenir;
Et qui mal quiert, mal ne li doit faillir.
Qui petit mal porchasse a son pooir,
Li grans ne doit en son cuer remanoir.

Bien devrions en l’estoire veoir
La bataille qui fu des deus dragons,
Si com l’en trove el livre des Bretons,
Dont il covint les chastiaus jus cheoir:
C’est cis siecles, qui il covient verser,
Se Deus ne fet la bataille finer.
Le sens Mellin en covint fors issir
Por deviner qu’estoit a avenir;
Mes Antecriz vient, ce poez savoir,
As maçues qu’Anemis fait mouvoir.

Savez qui sont li vil oisel punais
Qui tuent Dieu et ses enfençonez?
Li papelart, dont li mons n’est pas nez.
Cil sont puant, ort et vil et mauvais;
Il ocïent toute la sinple gent
Par lor faus moz, qui sont li Dieu enfant.
Papelart font le siecle chanceler;
Par saint Pierre, mal les fait encontrer!
Il ont tolu joie et solas et pais
Cil porteront en enfer le grief fais.

Or nos doint Deus lui servir et amer
Et la dame c’on ne doit oublier,
Qui nos vueille garder a touz jors mais
Des puz oiseaus qui ont venin es bes.