Ma chanson n'est pais jolie
Ke vos vuel retraire;
Trop ai museit a folie,
Ne m'en puis plus taire.
Je cuidai avoir amie
Saige et debonaire,
Maix je la truis anemie
Et vers moi contraire.
Fauce feme soit honie
Et de fol afaire,
Ke de chascun ki la prie
Veult son amin faire.
Autant aimme velonnie
Entor li atraire
Com elle fait cortoissie
Bien fait a desplaire.
Pués k’elle s’est aploïe
Del tout a mal faire,
Guerpir doi sa compaignie
Et arriere traire.
Fauce feme soit honie
Et de fol afaire,
Ke de chascun ki la prie
Veult son amin faire.
Retenir vuel de m’amie
Un teil examplaire:
Chascuns ki a li s’otrie
En fait tout son plaire.
Teille amor est tost perie
Ke croist en teile aire;
Longuement ne la puet mie
Moneir k’il n’i paire.
Fauce feme soit honie
Et de fol afaire,
Ke de chascun ki la prie
Veult son amin faire.
Grant note ait enchairgie
Cui teil femme maire,
Car il est de jalousie
Et prevos et maire;
Et s’est cous, je n’en dout mie,
C’on ne puet defaire;
J amaix n’avrait bone vie,
Si ait mult grief haire.
Fauce feme soit honie
Et de fol afaire,
Ke de chascun ki la prie
Veult son amin faire.
Or vos dirai k’elle endure
Per son grant folaige:
Elle ait sovent batteure
Tant ait d’aventaige!
En vilteit et en ordure
Ait mis son usaige.
Ce hi fait honte et laidure;
C’est per son outraige.
Fauce feme soit honie
Et de fol afaire,
Ke de chascun ki la prie
Veult son amin faire.
Se jamaix ai de li cure
En tout mon eaige,
Deus me doinst male aventure
Per mei mon visaige!
Fauce feme soit honie
Et de fol afaire,
Ke de chascun ki la prie
Done son coraige.