Chanterai por mon corage
Que je vueill reconforter,
Car avec mon grant damage
Ne vueill morir n’afoler,
Quant de la terre sauvage
Ne voi nului retorner
Ou cil est qui m’assoage
Le cuer quant j’en oi parler.
Deus, quant crïeront «Outree »,
Sire, aidiez au pelerin
Por qui sui espöentee,
Car felon sunt Sarrazin.

Souffrerai en tel estage
Tant que voie rapasser.
Il est en pelerinage,
Dont Deus le lait retorner.
Et maugré tot mon lignage
Ne quier ochoison trover
D’autre face mariage;
Folz est qui j’en oi parler.
Deus, quant crïeront  «Outree »,
Sire, aidiez au pelerin
Por qui sui espöentee,
Car felon sunt Sarrazin

De ce sui au cuer dolente
Que cil n’est en cest pais
Qui si sovent me tormente;
Je n’en ai ne gieu ne ris.
Il est biaus et je sui gente.
Sire Deus, por que feïs?
Quant l’une a l’autre atalente,
Por coi nos as departis?
Deus, quant crïeront  «Outree »,
Sire, aidiez au pelerin
Por qui sui espöentee,
Car felon sunt Sarrazin

De ce sui en bone atente
Que je son homage pris;
Et quant la douce ore vente
Qui vient de cel douz païs
Ou cil est qui m’atalente,
Volentiers i tor mon vis
Adont m’est vis que je le sente
Par desoz mon mantel gris.
Deus, quant crïeront  «Outree »,
Sire, aidiez au pelerin
Por qui sui espöentee,
Car felon sunt Sarrazin

De ce fui mout deceüe
Que ne fui au convoier.
Sa chemise qu’ot vestue
M’envoia por embracier.
La nuit, quant s’amor m’argüe,
La met delez moi couchier,
Toute nuit a ma char nue,
Por mes malz assoagier.
Deus, quant crïeront  «Outree »,
Sire, aidiez au pelerin
Por qui sui espöentee,
Car felon sunt Sarrazin