L’autrier quant je chevauchoie, desouz l’onbre d’un prael
Trouvai gentil pastorele, les euz verz, le chief blondel,
Vestue d’un blïaudel,
La color fresche et vermeille; de roses fet un chapel.
Je la saluai, la bele; ele me respont briément.
"Bele, avez vous point d’ami qui vous face biau senblant?"
Tantost respont en riant:
"Nenil voir, chevalier sire, mes g’en aloie un querant.
— Bele, puis qu’ami n’avez, dites se vos m'amerez."
EIe respont conme sage: «Oïl, se vous m’espousez.
Lors ferez voz volentez,
Et, se querez autre chose, ce seroit desloiauté.
— Bele, ce lessiez ester; n’avons cure d’espouser!
Ainz demerrons nostre joie tant com la porrons mener,
De besier et d’acoler,
Et je vous ferai fiance que je n’avrai autre a per. "
"Sire, vostre biau senblant va mon cuer si destraignant
Vostres sui, que que nus die, des cestui jour en avant."
N’ala pas trois pas avant;
Entre ses braz l’a sesie deseur l’erbe verdoiant.
En mi la rousee que nest la for,
Que la rose est bele au point du jor!
Par mi cele arbroie
Cil oisellon s’envoisent
Et mainent grant baudor.
Quant j’oi la leur joie,
Pour riens ne m’i tendroie
D’amer bien par amors.
La pastore ert bele et avenant;
Ele a les euz verz, la bouche riant.
Benoet soit li mestre
Qui tele la fist nestre,
Bien est a mon talent.
Je m’assis a destre,
Si li dis: « Damoiselle,
Vostre amor vous demant. »
Ele me respont: « Sire champenois,
Par vostre folie ne m’avrois des mois,
Car je suis amie
Au filz dame Marie,
Robinet le cortois,
Qui me chauce et lie
Et si ne me let mie
Sanz biau chapiau d’orfrois. »
Quant vi que proiere ne m’i vaut noient,
Couchai la a terre tout maintenant,
Levai li le chainse,
Si vi la char si blanche,
Tant fui je plus ardant,
Fis li la folie.
El nel contredist mie,
Ainz le vout bonement.
Quand de la pastore oi fet mon talent,
Sus mon palefroi montai maintenant,
Et ele s’escrie:
« Au filz sainte Marie,
Chevalier, vos conmant;
Ne m’oublïez mie,
Car je sui vostre amie,
Mes revenez souvent. »
Hui main par un ajornant
Chevauchai ma mule anblant;
Trouvai gentil pastorele et avenant;
Entre ses aigniaus aloit joie menant.
La pastore mult m’agree,
Si ne sai dont cie est nee
Ne de quels parenz cie est enparentee;
Onques de mes euz ne vi si bele nee.
Pastorele, pastorele,
Vois le tens qui renouvele,
Que raverdissent vergiers et toutes herbes;
Biau deduit a en vallet et en pucele. »
«Chevalier, mult m’en est bel
Que raverdissent prael,
Si avront assez a pestre mi aignel;
Je m’irai soef dormir souz l’arbroisel.»
«Pastorele, car souffrez
Que nos dormons lez a lez,
Si lessiez voz aigniaus pestre aval les prez;
Vos n’i avrois ja damage ou vous perdez.»
«Chevalier, par saint Simon,
N’ai cure de conpaignon;
par ci passent Guerinet et Robeçon,
Qui onques ne me requistrent se bien non.»
«Pastorele, trop es dure,
Qui de chevalier n’as cure;
A cinquante boutons d’or avroiz çainture,
Si me lessiez prendre proie en vo pasture.»
«Chevalier, se Deus vos voie,
Puis que prendre voulez proie,
En plus haut lieu la pernez que ne seroie;
Petit gaaignerïez et g’i perdroie.»
«Pastorele, trop es sage
De garder ton pucelage;
Se toutes tes conpaignetes fussent si,
Plus en alast de puceles a mari. »