S’onques chanters m’eust aidié,
Trop me sui de chanter teus;
Nonpourquant tant m’a avancié
Qu’en loiauté m’est loz creuz.
Par cel loer sui deceus
Si com cil c’on be aujoer,
Cui tant plaist ce qu’il s’ot loer
Ne set mot s’a ses dras perdus;
Einsinc sui de sens deceus.

S’Amours ot ainc en soi pitié,
Puis que sui pour loial tenus,
Trouver doi boial amistié,
 Car honc tans m’i sui atendus.
Avoir la doi, se ainc l’ot nus!
Mais onques, ce me fait douter,
Cordoaniers n’ot bon sohler,
N’ainc drapiers ne fut bien vestus,
N’ainc n’ot amie loiauz drus.

De tant m’a Amours alegié,
Quant g’i vois, que bien sui venuz.
Maiz s’i truis noient d’amistié,
Lors que m’en part, m’est retoluz.
Si sui li povres durfeus
C’on fait l’or fouir et quester;
Sel guaite on si pres qu’enporter
N’en puet rienz, tant l’ait bien repus;
Si s’en depart povres et nus.

Et quant si me sent atirié,
Ne me feroit bon traire ensus
Ainz que plus m’ait adamagié?
Or ai je dit que recreus,
Si fais com l’enfes desseus.
Quant s’est ars par trop pres chaufer,
En l’iaue court son doit bouter
Pour alegier; lors se cuist pluz:
Char que fous blece sane fus.